Ang tungkulin bilang makatâ ng bayan

ANG TUNGKULIN BILANG MAKATÂ NG BAYAN

minsang tinuring na / makatâ ng bayan

nang tula'y binigkas / sa isang pagkilos

lagi iyon pag may / rali sa lansangan

pinaghahandaan / yaong isyu't datos

may ilang tungkuling / isinasabuhay

pag tinuring kang / makatâ ng bayan

suporta sa iyo'y / mahalagang tunay

upang tungkulin mo'y / iyong magampanan

agad saliksikin / ang isyu ng madlâ

sapagkat lalamnin / ng tulang gagawin

tutulâ sa rali / ng obrero't dukhâ

ang kanilang diwa't / puso'y pag-alabin

kayâ madalas na / may tugmâ at sukat

sa bawat taludtod/ ay biláng ang pantig

madaling araw pa'y / mumulat, susulat

kakathâ ng tula, / sa papel tititig

kung may kathang tulâ / ang mga kasama

humingi ng kopya / at aking tipunin

upang balang araw / ay maisasama

sa malalathalang / planong aklat na rin

matinding tungkulin / subalit marangal

gagawin ng husay / ang bawat gampanin

kakathâ akong may / buong pagmamahal

na para sa bayan, / tula'y bibigkasin

- gregoriovbituinjr.

12.16.2025

* salamat sa kasamang kumuha ng litrato